Lev 3 | NdeIBE | STEP | “ ‘Nxa umnikelo womuntu ungumnikelo wobudlelwano njalo abesenikela ngesifuyo esisuka emhlambini esiduna kumbe esisikazi, kumele alethe kuJehova isifuyo esingalasici.

Leviticus 3

Umnikelo wobudlelwano

1 “ ‘Nxa umnikelo womuntu ungumnikelo wobudlelwano njalo abesenikela ngesifuyo esisuka emhlambini esiduna kumbe esisikazi, kumele alethe kuJehova isifuyo esingalasici.

2 Kumele abeke isandla sakhe ekhanda lesifuyo abesesihlabela esangweni leThente lokuHlanganela. Ngemva kwalokho amadodana ka-Aroni, abaphristi, azachela igazi emaceleni wonke e-alithare. 3 Kumnikelo wobudlelwano uzaletha umhlatshelo owenziwa kuJehova ngomlilo: idanga lonke elembese ezangaphakathi, 4 izinso zombili lamahwahwa azo eduzane lesinqe, lamahwahwa embese isibindi kuzasuswa ndawonye lezinso. 5 Ngakho amadodana ka-Aroni azakutshisela e-alithareni phezu komnikelo wokutshiswa ophezu kwenkuni ezibhebhayo njengomnikelo owenziwa ngomlilo, uqhatshi olumnandi kuJehova.

6 “ ‘Nxa anganikela ngesifuyo esisuka emhlambini wezimvu njengomnikelo wobudlelwano kuJehova, kuzamele anikele ngesiduna kumbe esisikazi esingelasici. 7 Nxa anganikela ngezinyane kumele alilethe phambi kuka Jehova. 8 Kumele abeke isandla sakhe ekhanda lomnikelo wakhe asihlabe leso sifuyo phambi kwesango leThente lokuHlanganela. Amadodana ka-Aroni azachela igazi laso emaceleni wonke e-alithare. 9 Emnikelweni wobudlelwano kuzamele alethe umhlatshelo owenziwa kuJehova ngomlilo; amahwahwa awo lomsila ononileyo aqunywe eduzane lomgogodla, idanga lonke lawo wonke amahwahwa embese ezangaphakathi, 10 izinso zombili lamahwahwa azo aseduzane lesinqe lalokho okwembese isibindi, okuzakhutshwa ndawonye lezinso. 11 Umphristi uzakutshisela ealithareni njengokudla, kungumnikelo owenziwa kuJehova ngomlilo.

12 “ ‘Nxa umnikelo wakhe kuyimbuzi, uzayethula phambi kukaJehova. 13 Uzabeka isandla sakhe ekhanda layo abeseyihlabela phambi kwesango leThente lokuHlanganela. Amadodana ka-Aroni azachela igazi layo emaceleni wonke e-alithare. 14 Kulokho akunikelayo kuzamele anikele kuJehova ngomlilo: idanga lonke lawo wonke amahwahwa embese ezangaphakathi, 15 izinso zombili lamahwahwa aseduzane lesinqe lalokho okwembese isibindi azakususa ndawonye lezinso. 16 Umphristi uzatshisela e-alithareni njengokudla, ngomnikelo owenziwa ngomlilo iphunga elimnandi. Wonke amahwahwa ngakaJehova.

17 “ ‘Lokhu kuzakuba yisimiso esingapheliyo ezizukulwaneni zenu zonke, loba lihlala ngaphi. Kakumelanga ukuthi lidle yiloba ngumhlobo bani wamahwahwa kumbe igazi.’ ”